اتعلم تحب بلدك

انا سما عندى ٢٥ سنه حكايتى بدأت من زمان اوى 
خصوصا فى أولى إعدادى لما شوفت فيلم لدوله ما وكنت مبهوره بكل حاجه فى المكان دة واتمنيت انى لو اروح فى يوم من الايام هناك وبعدين لقيت نفسى كل شويه بيعجبنى بلد شكل واقعد اتخيل انى بروح فى كل واحده فيهم مره وانى بلف العالم 

وبقيت اعيش احلام اليقظه كتير مع إن بابا موظف بسيط ومفيش حاجه متكفله انى اروح دة غير إن فكره السفر فى ذات نفسها مستحيله عند بابا ومكانش قدامى حل تانى غير الاحلام لدرجه انى بقيت ناقمه على عيلتى وعلى اهلى

 واصحابى وبلدى وكل حاجه هنا ومش بفكر غير فى السفر بأى طريقه وكانت صاحبتى عارفه بموضوعى وهيه تعتبر اقرب حد ليا وكنت دايما بحكلها لحد ما فى يوم لقيتها جايه تقولى اغرب حاجه فى حياتى وهيه أنها كانت بتكلم واحد على الفيس بوك على أساس أنها انا وبعتتله صورتى وهو اتعلق بيها هيه وبشخصيتها وخفه دمها بس فى نفس الوقت شاف صورتى وبقيت اقولها انتى ايه اللى عملتيه دة 

قالتلى مش قولتى انك نفسك تسافرى انتى عارفه دة مسافر فين وقالتلى أنه فى نفس المكان اللى نفسى اروحله 
ولأول مره حسيت أن قلبى بيدق دقات سريعه
واكيد مش من حبه يعنى ولكن من الفرصه وانى هسافر واستغربت أنها عملت معايا حاجه زى دى 

وفعلا جيه الشخص دة اتقدم واتوافق عليه بس المشكله إنه بقا يفكرنى بحاجات ما بيننا قولناها ومعلومات عنه مفروض اكون عارفاها بس انا ولا اعرف حاجه وهوه كان يقعد بهزر ويقولى انا شكلى هتجوز واحده عندها ذاكره سمكه ولا ايه 
وانا مكنتش مستريحه لأى حاجه خالص مكنتش شايفاه كعريس كل اللى كنت بفكر فيه هوه السفر 
السفر وبس......

وتم الزواج وسافرت وشوفت حلم عمرى قصادى بيتحقق 
بس لقيت طبع زوجى وحش جدا متعصب دايما على عكس ما شوفته فى أيام الخطوبه كنت ببقى عايزه اشتكى لحد عمر بس محدش معايا كان نفسى أجرى على بيت أمى اعيطلها بس انا فين دلوقتى انا لوحدى فى بلد غريبه 

يوم واتنين وتلاته بقا كل حاجه عادى بقا كل حاجه مبهره انطفت زيها زى اى حاجه عايشه وخلاص 

وفى يوم حصل موقف عمرى ما نسيته وهو لما اغمى عليا فى الشارع من الضغط اللى اتعرضلته ومحدش جيه جنبى ولا فوقنى على عكس ما لو كنت فى مصر كان زمانى الف راجل وست طيبين خدونى على اى مستشفى 

عدى عليا رمضان وعيد وكل المناسبات وكل حاجه بقا ليها طعم ماسخ مفيش فانوس متعلق ولا صوت اذان ودة لأن اقرب اذان منا على بعد مسافه كبيره 
مبقتش افكر فى حاجه غير انى عايزه انزل مصر 
بس مش هوه دة كان حلمى اللى بدور عليه !!!!؟
مش هوه دة حلمى اللى ضحيت بكل حاجه واتجوزت واحد غريب فى بلد غريبه علشانه !!؟
اتحاسبى بقا يا سما على اختياراتك
وحقيقى الغربه مره ومفيش حد بيرتاح بعيد عن وطنه 
مش معنى كده أن السفر وحش 
لو هتبقى عباره عن فسحه كام يوم هتبقى حلوه لأن ببساطه كل حاجه جديده بتبقى حلوه لكن كله زى بعض ويمكن تبقى فاهم غلط 
كل الاماكن زى بعض وكل الاماكن متفرقش عن بعض 
اختيار الهجره صعب اوى والعمر بيمر بعيد عن اهلك وناسك وجيرانك 
هتبقى محبوس فى سجن كبير كل ما يحصل مناسبه يصعب عليك حضورها 
حقيقى مفيش اجمل من بلدك واهلك وناسك 
باقى البلدان حلوه اوى فعلا وفيها اكيد مميزات بس خليها مجرد فسحه زى ما بنخرج نتفسح فى شوارعنا 

لكن فى النهايه بنروح وننام فى بيوتنا واماننا ووطننا...  ...