اذا قررت التلاعب بالسحر فتحمل نتيجه قرارك

انا على شاب عندى ٢٥ سنه عندى محل ادوات كهربائيه  و كنت بحب اوى من وانا صغير اتفرج على القصص الرعب واسمع عن الحاجات الغامضه مع انى كنت صغير بس مكنتش بحب اقعد العب زى الاطفال ولا اتفرج على كرتون

اذا قررت التلاعب بالسحر فتحمل نتيجه قرارك

انا على شاب عندى ٢٥ سنه عندى محل ادوات كهربائيه
 و كنت بحب اوى من وانا صغير اتفرج على القصص الرعب واسمع عن الحاجات الغامضه مع انى كنت صغير بس مكنتش بحب اقعد العب زى الاطفال ولا اتفرج على كرتون
 لا دة انا كانت هوايتي المفضله انى اقعد اتفرج على القصص الرعب واستمتع بيها وكنت بحاول اخلى اخويا يتفرج معايا ومع إنه كان اكبر منى بتلات سنين بس مكانش بيحب اوى يتابع الرعب بالرغم إنه شغال فى مشرحه فى مستشفى جنبنا ومفروض يبقى قلبه ميت بس مبيتفرجش ابدا على الرعب دة خالص وبيقولى كفايه الرعب اللى بشوفه هناك 
المهم كبرت وبقى قصص الرعب دى مش طموحاتى انا بدور على مغامره اكبر تخلينى اترعب كده بجد 
كنت فى يوم من الايام كالعاده بسمع قصه لشخص بيحكى قصص رعب على النت وكانت القصه بتتكلم عن كتب السحر وإن فيه طلاسم لو اتقالت هيحضر الجن وابتدى الموضوع يعلق فى دماغى جدا مش عارف ابطل فيه سواء كنت فى الشغل أو فى البيت وخلاص قولت انا قررت انى هجيب كتاب سحر واقرى فيه وأشوف إيه اللى هيحصل اكيد دة اشتغاله مش مجرد ما اقول شويه كلام هحضر العفريت يعنى
وابتديت افكر إيه المكان المناسب اللى هلاقى فيه كتاب زى دة ورحت فى شارع كده مليان كتب قديمه وبصراحه اتكسفت انى اسأل اى شخص عن الكتاب دة وابتديت ادور بنفسى وللأسف كل محاولاتى فشلت انى الاقى كتاب زى دة والموضوع بدأ يكبر فى دماغى اكتر ما زى ما بيقولوا كده ( الممنوع  مرغوب ) وابتديت ادور اكتر واكتر لدرجه انى كلمت صاحبى أنه لو لقاه يجيبهولى 
فصاحبى بعد كام يوم كده لقيته بيتصل بيا وبيقولى عندى ليك حاجه كنت بتدور عليها 
قولتله اوعا تكون جبتلى الكتاب وانا عينيا بتلمع من الفرحه 
قالى هوه مفيش غيره قابلنى بقا يلا علشان اديهولك تعالى الورشه عندى هتلاقيه موجود قولتله خلاص هعدى عليك بعد الشغل
روحتله بعد ما قفلت المحل وقالى اهو ياعم الكتاب اللى مدوخنا عليه 
خلى بالك يا على صاحب الكتاب دة قالى انك لو تعمقت فيه هتتأذى بجد وخصوصا انك ملكش فى السكه دى والله يابنى لولا انى عارفك من زمان وعارف حبك للمغامرات دى كنت قولت عليك عايز تشتغل دجال 
قولتله طب قولى صح انت جبت الكتاب دة منين 
قالى مفيش ياعم واحد بيصلح عندى العربيه وسمعت أن جده ليه فى سكه السحر والشعوذه دى ومعروف اوى يعنى اسمه خليل عمران فقصدته أنه يجيبلى كتاب من عنده بس خلى بالك هو حذرنى جامد
قولتله ياعم متقلقش ماعفريت إلا بنى ادم 
وخدت الكتاب وروحت بيه امى قالتلى تعالى اتعشى من كتر ما انا عايز اشوف الكتاب قولتله انى مش جعان مع انى فعلا كنت جعان
دخلت وكان مكتوب على الكتاب من بره 
( هذا الكتاب حقيقى ويحتوى على طلاسم حقيقيه فلابد من سبق معرفتك بأمور السحر وإذا قررت أن تتلاعب بالسحر فتحمل نتيجه قرارك)
قعد اقلب فى الصفحات وبصراحه كده لما الكتاب بقا فى ايدى مش عارف ليه قلقت وفكرت كتير انى أتراجع 
لقيت صفحه مكتوبه بتقول إذا اردت تحضير الجنى*** فعليك القيام بهذه الطقوس وذكر الطلاسم
 ساعتها قولت الموضوع دة عايز بالليل فى وقت متأخر بعد لما البيت كله ينام وقومت اتعشيت معاهم وكنت عايزهم يناموا بسرعه اوى علشان اقدر اشوف آخره الكتاب دة بقا ايه وفعلا دخلوا ناموا
فطلعت الكتاب وابتديت امشى ورا الخطوات اللى مكتوبه فى الكتاب وشغلت كاميرا الموبايل علشان اسجل اللى هيحصل وخلصت خلاص كل الطقوس وفضلت قاعد مستنى النور يتقطع ولا شباك يترزع ولا اى حاجه غريبه روحت اشوف الفيديو قولت يمكن الاقى فيه اى حاجه مريبه بس ملقتش ساعتها بقيت اشتم فى صاحب الكتاب دة واقول مهو دجال عايز ايه من واحد دجال اكيد كتابه هيبقى دجل فى دجل برضوا وقال إيه مكتوب مليون تحذير على الكتاب اهو كله شغل دعايه وخلاص 
نمت وصحيت الصبح علشان أفطر مع اخويا وامى بره وقعدت على السفره لقيت اخويا بيقولى انت مش هتبطل حركاتك دى يا على انا قولتلك مليون مره مبحبش الهزار الغشيم دة 
قولتله مالك يابنى فيه ايه انا لمستك ولا جيت جنبك قالى يعنى مش فاكر الخضه اللى خضيتهالى امبارح لما كنت هتوقف قلبى 
قولتله بأستغراب انا!!!!!!!
ياعم تلاقيك بتحلم انا من ساعه ما دخلت اوضتى الساعه تسعه وانا شغلت الاباجوره وقعدت اقرى شويه قصص كده  لحد لما نمت على الساعة ١٢ كده 
لقيته بيقولى مش قولتلك انك كداب
يا كداب النور مقطوع من الساعه ١٠ يبقى ازاى محستش أن النور مقطوع واباچوره ايه اللى شغاله بقااا 
قولتله لا فهمنى كده يا جابر ايه اللى حصل امبارح 
قالى ياعم انا اول ما النور قطع روحت علشان ادور على اى شمعه ولا اى حاجه انور الاوضه بيها ودخلت أسألك عن الولاعه بتاعتك بس لقيتك نايم قعدت انادى عليك كتير مسمعتنيش 
فسبتك نايم ودخلت المطبخ اشوف ولاعه ولا كبريت 
روحت جبت الولاعه وبشغل الشمعه لقيتك قاعد على كرسى الانتريه فى الضلمه انا من الخضه كنت هرمى الشمعه وهيه مولعه من ايدى قعدت ازعقلك انت يابرودك يا اخى دخلت تنام وسيبتنى اتكلم مع نفسى
 خلى بالك فى يوم من الايام هتعمل مصيبه بسبب مقالبك دى 
طبعا ساعتها انا ابتديت استوعب ايه اللى حصل بس انا مش فاهم ازاى انا كنت صاحى وقاعد ومش حاسس بكل دة وازاى النور اتقطع وانا كنت مشغله وازاى جابر يدخل يكلمنى ويلاقينى نايم إذا كان انا اصلا منمتش إلا الساعه ١٢ بالليل
افكار كتير دارت فى دماغى ساعتها بس طبعا مقولتش اى حاجه لجابر انا عارف أنه ممكن يروح فيها لو قولتله حاجه زى كده 
نزلت على شغلى وقابلت محمد اللى جابلى الكتاب وقعد يهزر ويقولى ايه يا على العفاريت طلعولك امبارح ولا ايه 
قولتله انت شكلك فايق والله انا هاخد بعضى وامشى علشان مش فايقلك 
فضلت طول النهار قاعد فى المحل مفيش زبون حتى دخل سأل مع إن من اول ما فتحت المحل ودايما الدنيا ماشيه الحمدالله وعمر ربنا ما روحنى مكسور الخاطر وكنت هقفل خلاص بعد لما الوقت اتأخر لقيت زبون دخل وسألنى على شاشه التليفزيون دى وقولتله سعرها قعد يفاصل لدرجه انى قولتله اتكل على الله ياعم معندناش حاجه هتتباع ساعتها زعق وقل أدبه عليا وضربنا بعض وجيه محمد علشان يسلك ما بيننا والناس اتلمت علينا واليوم انتهى بعركه من غير اى بيع ولا شرا 
خدت بعضى وروحت على البيت قولت هفك شويه مع امى وجابر يمكن انسى اللى انا فيه 
لقيت جابر تعبان وحرارته عاليه وامى عماله تعمله فى كمادات وعمال يترعش من السخونيه قولتلها فيه إيه يا امى ايه اللي حصله 
قالتله والله يابنى ما اعرف دة كان زى الفل وقعد يهزر زى كل يوم ونزل على شغله لقيت زمايله فى الشغل شايلينه وجايين بيه وبيقولولى أنه اغمى عليه هناك وتعبان شويه وقلبى انخلع عليه لما شوفتهم شايلينه وجايبينه على هنا 
قعدت جنبه وفتحت المصحف وقعدت اقراله قرأن 
لانى تخيلت ايه اللى حصله
ودخلت نمت وانا نايم حسيت بحركه فى الشقه قولت اروح اشوف فيه ايه يمكن جابر محتاج حاجه دخلت المطبخ ملقتش حد 
بس لقيت اكتر حاجه صدمتنى لقيت نسخه منى قاعده على كرسى الانتريه قعدت أقرى قرأن فى سرى واقول انت مين 
قعد يضحك ويقولى انا اللى انت ناديتنى وجبتنى للعالم بتاعك انا اللى هخلص عليكوا واحد واحد وقعد يضحك وكان صوته عالى جدااا لدرجه انى حسيت أن الحيطه هتتشق من الصوت وفجأه اختفى 
لقيت نفسى نايم على السرير بس انا متأكد أن كل حاجه انا شوفتها حقيقه 
روحت اتطمن على جابر كان وشه مخطوف اوى قولتله مالك يا جابر إيه اللى حصلك 
فى الأول كان مش عايز يحكيلى لكن لما ضغطت عليه قعد يحكيلى ويقولى : انا روحت النهارده الشغل واستلمت الورديه من زميلى وكان فيه حثه لسه داخله المشرحه فدخلت علشان اعمل اللى المفروض يتعمل ولسه بشيل الملايه من على الجثه لقيت امك هيه اللى تحت الملايه انا ساعتها محستش بنفسى غير وانا على الأرض وهما بيفوقونى وانا اللى عليا انى عايز اقوم وانا دايخ علشان اشوف امك بس لما قومت ملقتش الجثه دى كانت جثه راجل جاى من حادثه حريق 
قعدت اعيط وازعق واقولهم انتوا اكيد خايفين عليا علشان الصدمه انا شوفت امى هيه فين قعدوا يقسموا بالله إن امى كويسه وحد فيهم اتصل بيها قصادى لحد لما ردت ساعتها هديت وزمايلى وصلونى لحد البيت وانا مش فاهم إيه اللى شوفته دة 
انا يدوب سمعت الكلمتين دول من جابر وخدت بعضى وروحت على الورشه عند محمد وقولتله قوم بسرعه ودينى للراجل اللى عطالك الكتاب 
قالى فيه ايه طيب فهمنى انا مش فاهم حاجه خالص ايه اللى جرا قولتله مفيش وقت هتعرف كل حاجه هناك قولى العنوان قالى انا مش معايا عنوانه انا معايا رقمه استنى هتصل بيه واعرف مكانه واقولك قولتله انا عايز عنوان جده مش عنوانه هو
واتصل بالرقم فعلا ورد عليه ورفض ابدا إنه يدينا عنوان جده بس مع إلحاح منى وانى بقوله انى واقع فى مصيبه محدش هينجدنى منها غير جدك وافق وقاله العنوان ومحمد قالى انا مش هسيبك انا هقفل الورشه وهاجى معاك
روحنا لجده وحكيناله لكن فوجئنا أن جده مش عارف حاجه عن الكتاب اللى انا خدته مع أن حفيده قال أن جده هوه اللى عطاه الكتاب وساعتها زعق فى حفيده ومشاه من المكان وهو قعد يبرر إنه كان عايز يخدم محمد ويجيبله اللى هوه عايزه مكانش يعرف أنه خطر اوى كده  ولو كان قال لجده مكانش هيرضى يديله حاجه 
ساعتها الراجل دة اتكلم معانا وحكيتله كل اللى حصل بالتفصيل 
قالى إن الجن دة مهمته إنه هيخلص على أهل بيتك 
بقيت فى حاله انهيار وقعدت أقوله شوفلى اى طريقه 
ان شاءالله انا اموت بس هما لا انا اللى استاهل الموت هما معملوش حاجه 
رد الراجل عليا وقال مفيش يابنى اى طريقه إلا إذا نزلت قبر حد لسه ميت وقعدت فيه ربع ساعه تقول الكلام اللى انا هقولهولك دة وساعتها ممكن اللعنه تنفك والجن يرجع لعشيرته ويسيبكوا فى حالكوا 
قولتله طيب انا هفكر واقولك مهو برضوا انا مش هقدر استحمل كده دى حاجه صعبه جدا 
قالى طب فكر وبسرعه قبل ما اهلك ييتدوا يتأذوا بجد وساعتها حتى قرار انك تساعدهم مش هتعرف خلاص 
طلعت من عنده وروحت البيت بس ملقتش حد ولا امى ولا جابر قعدت اتصل بيهم كتير محدش بيرد لما كنت خلاص هتجن 
لقيت جابر بعد شويه بيتصل وبيقولى أنه مع امك فى المستشفى
طلعت أجرى على المستشفى وجابر حكالى إن امى اغمى عليها ومش بتفوق ولما أخدها على المستشفى  الدكاتره مش عارفه دة سببه ايه كل حاجه سليمه وضربات القلب كويسه والسكر والضغط كويسين 
بدأوا يعملوا إشاعات علشان يعرفوا الاغماء دة سببه ايه بس نتيجه التحاليل كلها سليمه وجابر هيتجن ومش عارف يعمل ايه
بس انا عارف انا هعمل ايه 
روحت اتصلت بالراجل وقولتله انا مستعد انى اعمل كل اللى تقول عليه 
قالى يبقى لازم تجيب جثه لسه متوفيه من قريب وتندفن معاها قولتله طيب اكيد انت هتعرف اى جثه يعنى 
قالى دة مش شغلى شوف انت حد 
اول حد جيه فى دماغى وافتكرته الراجل اللى كان جاي فى حادث الحريق اللى جابر قال عليه 
ساعتها روحت لجابر وسألته عن قبر الراجل اكيد مكتوب عنده فى السجلات جابر ساعتها استغرب جدا وقعد يقولى ليه يعنى يا على إيه الطلب الغريب دة هوه انت عايز عنوان القبر ليه 
قولتله جابر هبقى احكيلك بعدين لو كان ليا عمر بس اللى انا بطلبه منك دة حاجه مصيريه رقبتنا متعلقه فيها 
وبعد كلام كتير قالى على مكان القبر وحذرنى انى اعمل اى حاجه غلط لان كده هو هيتضر فى شغله وعدته انى مش هعمل اى مشاكل تضره فى شغله 
واتصلت بالراجل وقولتله على العنوان وقالى هستناك على الساعه اتنين 
قولتله لا طبعا أنا مش هنزل بالليل انا كده هموت من الرعب 
زعق فيا وقالى اومال عايزنى اوديك امتى سعادتك الصبح علشان تتمسك انت فاكر نفسك حاجز فى فندق سبع نجوم
اسمع اللى بقولك عليه بدل هسيبك تتحمل نتيجه فضولك دة لوحدك أنا لولا حاسس بالذنب من اللى حفيدى عمله مع انك اللى كنت السبب فيه مكنتش عبرتك 
روحت لمكان القبرة ولقيته واقف مستنينى ومعاه كشاف صغير يدوب كاسر ضلمه القبر وعطالى ورقه كانت مليانه بكلام مش مفهوم وغريب وقالى لف على الجثه اللى تحت سبع مرات وانت بتقول الكلام دة 
سمعت كلامه وانا بقدم رجل وبأخر رجل لحد لما نزلت على باب القبر ودخلته وانا قلبى بيترجف من كتر الرعب ومن منظر الجثه وبقيت عمال الف حوالين الجثه واقول الكلام اللى معايا بسرعه وانا قلبى هيقف علشان اطلع أجرى من المكان دة وانا سامع صوت ضحكات ماليه المكان وطلعت أجرى بره وانا مش قادر اخد نفسى 
بس ملقتش الراجل 
خدت بعضى وروحت على البيت وانا متأكد إن كل حاجه هترجع زى الأول ومش مصدق انى لسه عايش بس روحت واتصدمت صدمه عمرى لما لقيت امى بنفس المنظر اللى سايبها عليه واخويا مكسور ومش عارف يعمل ايه 
طلعت أجرى على محمد وبقيت اصرخ فيه بطريقه هستيريه واقوله ودينى عند النصاب الدجال اللى وديتنى عنده 
قعد يقولى دجال إيه انا مش فاهم حاجه ووديتك عند مين انت بتتكلم على ايه 
قولتله نعم يا خويا وديتنى عند الدجال النصاب جد الراجل اللى اخدت منه الكتاب 
لقيته بيقولى :  على انت إيه اللى بتقوله دة جد الزبون اللى بيجيلى ميت محروق من بعد ما انا عطيتك الكتاب بأسبوع
انا كان هيغمى عليا من الصدمه اومال مين اللى خدنى للقبر بتاع الراجل المحروق.   
 المحروق !!!!!!!!!
 واول ما سمعت كلمه محروق دى ابتديت اجمع الخيوط 
طلعت أجرى على جابر واقوله قوم بسرعه ودينى المشرحه عايز اعرف اسم الراجل اللى انت شوفته 
قعد يقولى انا مش فاهم حاجه انت هتقولى فيه ايه ولا أمد ايدي عليك احنا من حقنا نفهم فيه ايه
ساعتها حكيتله كل حاجه وبقى مش مصدق نفسه من اللى حكيتهوله وقعد يضرب فيا وانا مش بدى اى رد فعل لانى استاهل بالعكس ضربه فيا كان بيريحنى من العذاب اللى انا فيه
وطلعنا نجرى على المستشفى وجبنا الاسامى ولقيت مكتوب اسم المتوفى "خليل عمران " 
طب مين اللى انا شوفته دة 
طب هوه عايز منى إيه
روحنا البيت واحنا طول الطريق مش بنكلم بعض 
دخلت اوضتى قفلت على نفسى ولقيت النور اتقطع 
فى العادى انا كان ممكن انادى على جابر ولا أخرج من الاوضه 
بس المره دى انا مش هطلع انا هستنى مقابلته ليا 
بس لقيت كيان مرعب غريب هوه اللى بيكلمنى وبيقولى 
إحنا خدام خليل عمران اللى هنستبدل روحك بروحه انت كده عملت كل اللى احنا طلبناه منك 
هو اللى مفروض يعيش ويكمل مسيرته 
أما أنت فهتتحبس فى جسده طول حياتك وهترجع نفس القبر وهو هيعيش فى بيتك بحياتك وهيرجع لمملكته وسحره تانى 
انت دفعت تمن فضولك ولازم تكمله للآخر 
بعد الساعه ما تيجى ال١٢ الأرواح هتتبدل وانت مش هيبقى ليك وجود هنا 
وفجأه اختفى. 
وانا فى كامل استسلامى
انا بكتبلكوا القصه دى علشان تبقى عبره لأى حد يبتدى يفكر أنه يدخل فى موضوع السحر دة من باب الفضول 
خلاص فاضل ساعتين  وكل شئ ينتهى ومش هيتبقى فيا غير القصه دى انا قررت انى هاخد القصه دى بعد ما اروح اشوف امى لاخر مره واتأسفلها واشوف اخويا وهو نايم  وهرميها فى النيل لانى مش حابب امى واخويا يعرفوها علشان يقدروا يتعاملوا مع الدجال اللى هيجسد نفسى 
بس لما تقرى الرساله ارجوك فكر مليون مره قبل ما تقرى حرب واحد حتى ممكن تدمر بيه حياتك وتقطع رزقك بإيدك وحياتك كلها تقف بسبب جمله قريتها من كتاب سحر 
ارجوك " اذا قررت التلاعب بالسحر فتحمل نتيجه قرارك "

ما هو رد فعلك؟

like

dislike

love

funny

angry

sad

wow