السحر انقلب على الساحر والجن قتل صاحبه ( لغز موت ساحر فيلم عاد لينتقم صاحب التعويذه الحقيقيه فى الفيلم )

ظهر فى اكتر الافلام المصريه رعبا واتسبب فى مشاكل كتير جدا جوا الفيلم وكانت هتتسبب فى منع عرض الفيلم وهو واحد من أكبر السحره وعالم الروحانيات اللى كانوا موجودين فى مصر وهو الحسينى الفلكى المعروف عنه بخادم الشيطان 

 

•  طب تعالوا نجيب القصه من الاول خالص 

اثناء تصوير فيلم عاد لينتقم كان مخرج الفيلم هو ياسين إسماعيل يس وكان عايز يعمل فيلم رعب يكسر الدنيا وكل حاجه فى الفيلم يكون فيها مصداقيه علشان الحبكه الدراميه بتاعه الفيلم تكمل وطبعا جيه المشهد اللى كلنا عارفينه وهما بيحضروا روح الطفل فى القصر جابوا عالم فى الروحانيات وقال تعويذه ومن المفترض إن الاتفاق انهم يجيبوا اى ممثل ويقول اى كلام وكده كده محدش هيفهم حاجه لكن يس إسماعيل يس رفض جدا وكان شايف إن دة هيأثر على مصداقيه الفيلم يقوم عامل إيه بقا ؟ 

يقوم يجيبلنا عالم الروحانيات المعروف جدا فى الوقت دة الحسينى الفلكى ويشترط عليه إنه يقول تعويذه تحضير جن حقيقيه فى الفيلم وقصاد الكاميرات وبرضوا كان كل اللى فى دماغ ياسين إسماعيل ياسين إنه حتى لو قاله إنه يقول تعويذه حقيقيه اكيد هوه مش هيقولك التعويذه كامله مهو اكيد مش هيخلى كل اللى فى الاستوديو يتلبسوا يعنى 

 وفعلا دة اللى حصل وجيه المشهد وقام الحسينى وقال التعويذه وكأنها جلسه تحضير أرواح حقيقيه  لا ينقصها شيء وفاجئ كل طاقم العمل وخلت التعويذه دى فى كل بيت مصرى وكل البيوت سمعتها واكيد كلنا لما بنيجى نسمع الرموز اللى قالها فى الفيلم بنحس بضيق وعدم ارتياح 

وجيل كامل اترعب من الفيلم كله وخصوصا المشهد دة اللى عمرنا ما هننساه 

 

•  دة غير اللى حصل لطاقم العمل فى الفيلم من مصايب وكوارث خلت كل الموجودين يتأكدوا إن الحسينى بالفعل استخدم تعويذه صحيحه 

 

•  الفيلم دة من 1988 واول ما الحسينى قال التعويذه من هنا حل الخراب فى اللوكيشن بتاع التصوير لدرجه إن المصور كان بيقول أنه كان بيشوف أشخاص غريبه مش موجودين اصلا قصاد كاميرا التصوير وبعد انتاج الفيلم اتوفى واحد من طاقم العمل من غير اى سبب وبعد لما تم عرض الفيلم فى السينما كان المشاهدين بيحسوا بشعور غريب وغير مريح بمجرد ما بيخرجوا من قاعه السينما دة غير الأحداث الغريبه اللى بتحصلهم ومن هما قرروا يمنعوا عرض الفيلم من السينما خالص 

 

• نرجع بقا للحسينى تانى 

فالمعروف عنه إنه والعياذ بالله عمل معاهده مع الشيطان وقام بمبايعته وبقا من أشهر السحره فى العالم كله ولجأ كتير من المشاهير إليه وعمل اكتر من كتاب للسحر الاسود 

ولكن تم العثور عليه وهو ميت موته شنيعه جدا ولما تم تبليغ الشرطه بالحادثه 

 

•  كان وصف الظابط للجثه كالأتى

قال بالظبط كده " عينه مبرأه ووجهه ازرق شاحب يكاد يكون متخشب وفمه كان مفتوح من الخضه " وفضل سر موت الحسينى مجهول محدش يعلمه ولكن الغريب هو علامات الخضه اللى ظهرت على جثته بالرغم إنه كان معتاد على رؤيه الجن فياترى شاف إيه وصله لدرجه الرهبه دى ؟ والعلم عند الله وبكده يكون موته لغز حير العالم كله 

 

•  ده غير إن الشرطه بقا أثناء اقتحامها المنزل لقت كميه اسحار كتيره جدا لمشاهير معروفين ومشهورين بالاسم لجأوا للساحر دة لأمور خاصه

 

•  أقاويل تانيه بتقول إن مراته هيه اللى قتلته أو شخص تانى هو اللى قتله بالسم إلا إن الاغلبيه شايفه إن القاتل هوه جن من أحد الجان اللى كان بيحضرهم علشان يساعدوه

 

•  اغرب الحاجات اللى عثروا عليها فى منزله 

الغريب أنهم لقوا كميات كبيره جدا من اللبن ومناديل مختلطه بالدماء وصور مشاهير كتير مكتوب فى ضهرها طلاسم وتعاويذ 

 

•  وزى ما قولنا فضل موته لغز بتبحث فيه الشرطه ودة لأن اكيد هما مش هيعتبروا الجانى هو الجان اكيد فيه سبب منطقى بالنسبالهم وإن الجانى لابد أن يكون بشر 

ولكن الصدمه كانت فى نتيجه الطب الشرعى وهى المفاجأه اللى قلبت موازين القضيه والتقرير كان " إن مفيش اى شخص من بنى الانس قام بقتله ولا اعتدى عليه ولا حتى مات بسبب هبوط حاد فى الدوره الدمويه وطبعا بالشكل دة بقا كله متفق إن الأرواح ليها يد فى وفاته ومفيش اى اثر لجلطات فى القلب ولا حتى فى المخ وبما إن الشرطه عمرها ما هتقتنع بمسأله الأرواح بالرغم من ان كل العوامل لتؤكد ذلك ولكن اتوجهت اصابع الاتهام لزوجه القتيل 

 

•  ولحد دلوقتى وفاه الحسينى لغز وشقه الحسينى لغز اكبر بكتير من وفاه الحسينى ودة بسبب اللى لقوه جوه الشقه  وهو زى ما ذكرنا كميات كبيره جدا من اللبن واكتر من 16 منديل عليه دم والسبب غير معروف  وطبعا استنتجوا إنه كان بيستخدمهم فى السحر 

ودة غير اللى لقوه فى غرفه نومه وطبعا شافوا اجنده تليفونات الفلكى اللى كان فيها ارقام لأشخاص فى غايه الخطوره الأهمية 

والجثه اتنقلت لبولاق الدكرور واللى اتهم زوجه الفلكى بشكل مباشر كان شقيق الفلكى ودة لأنها كانت بتصغره فى السن بحوالى 40 سنه وكان عمرها 23 سنه واكيد دست له السم بدافع قتله وقال إنه قبل مقتل شقيقه بيوم كان حاضر وشهد مشاجره بينها وبين شقيقه ووصلت المشاجره للتشابك بالايدى وهددت فيها انها هتترك البيت ولما تم استدعاء رسا زوجه القتيل قالت إنها اتجوزته بعد قصه حب كبيره وإنها كانت من أشد المعجبين بكتب الفلكى ولما عرض عليها الزواج فرحت جدا وقبلت على الفور وحلمت إنها تتجوزه وتعيش حياه السحر وتشوفها على الطبيعه لأنها كانت محبه لكل ما هو خارق للطبيعه وبقت نجمه من نجمات المجتمع وبتحضر معاه كل المؤتمرات وبتسافر معاه كل البلدان وكانت بمثابه مديره أعماله ومنظمه لمواعيده وكانت سعيده جدا بحياتها الجديده اللى كانت بتتمناها وكانت بتحب زوجها جدا وهو كمان بيحبها ولكن الحلو ميكملش زى ما بيقولوا ودة علشان بدأت الغيره تدخل فى قلب الفلكى وحس إن فارق السن الكبير اللى بينهم هتجعل رشا زوجته محط أطماع الشباب وكان بيحاوطها بغيرته بكل الطرق ووصلت الغيره لحد الضرب وانقلب حلم رشا لكابوس وضرب واهانه من الفلكى  وبدأت المشاكل تزيد خصوصا إن اخوات الفلكى كانوا بيفروا من اخوهم لدرجه انهم طلبوا منه بشكل صريح إنه يقوم بتطليقها وفعلا ابتدى الحسيني يتأثر بكلام اخواته وقبل حادث موته كان فعلا فيه مشاجره كبيره ولكن والد رشا حاول تصليح العلاقه وفى يوم وفاته كان شرب خمور كتير جدا واللى كان معروف بحبه الشديد ليها لدرجه الجنون افتاجئت بحالته الصحيه اليوم دة أنها متدهوره جدا على غير العاده وبدأ فى القئ ونقلته لمستشفى فى نفس العقار ولكنه كان اتوفى ومن بعدها تم اتهامها بمقتل زوجها 

 

• وفى النهايه اتحفظت القضيه وكتبوا إن سبب الوفاه غير مجهول 

وفضل الفيلم  لحد يومنا دة فيه قاقه سلبيه رهيبه فحاول لو ناوى تتفرج على الفيلم تانى تقلب الجزء بتاع التعويذه وياريت متبقاش لوحدك فى البيت.........

 

 

بقلم دعاء فرج.........