اللى بيعملوه دة صح ولا غلط ؟ مش مهم الأهم إنه بيجيب فلوس

الفتره الاخيره دى بقينا نشوف فيديوهات غريبه كده او يمكن فى مجتمعنا دلوقتى مبقاش فيه حاجه غريبه 

بقينا نشوف العروسه اللى بتبقى غريبه اكتر هيه اللى بتطلع تريند اكتر واكتر 

 

•  غريبه ازاى يعنى ؟

يعنى نلاقى عروسه طالعه تريند برقصه جديده مع صحابها 

نلاقيها عملت موقف مريب فى القاعه مش مألوف فى مجتمعنا الشرقى 

وعادى جدا لو لقيناها قالت كلام للعريس يكون إهانه ليه فى وسط القاعه مقابل انها تطلع تريند والغريب إن العريس بيكون بالنسباله عادى مهو كمان بيبقى عايز يطلع تريند 

كل يوم بنلاقى فيديو لعريس وعروسه بيكون مختلف عن اللى قبله بس الاختلاف دة بيشترط أنه يكون غير مألوف 

اومال هيطلع تريند ازاى؟! 

مهو لازم يكون فيه حاجه مختلفه فى الموضوع علشان الفيديو يتنشر ويجيب مشاهدات كتير 

 

•  طب إيه استفادتهم من تنزيل الفيديو ؟

معظم الشباب بقوا شايفين إن حياه البلوجر هيه الحياه المثاليه وإنها هيه التأمين للمستقبل واسهل طريق لجلب الفلوس والشهره

للأسف شباب كتير مبقاش عنده مانع أنه يظهر حياته واسرته على السوشيال ميديا وياخد قصادها آلاف الجنيهات من غير مجهود 

فنلاقى العروسه من دى لما تطلع تريند عامله قناه تحت عنوان اسره ( فلان و فلانه ) وتبدأ الناس تتباع حياتهم 

بهدف التسليه وللأسف احنا اللى بنساهم فى زياده الأشخاص اللى زى دى 

وبقت مهنه من لا مهنه له 

وبقا فيه شباب كتير بيعقد على فتاه بغرض إنه فى المستقبل يفتح قناه ويباشروها سوا بغرض الربح ومش بغرض تكوين اسره وانهم يشقوا طريق حياتهم بالسهل من غير تعب ولا شقى 

مجرد كاميرا واطلع لايف واتشهر 

اللى يعملوه دة صح ولا غلط مش مهم المهم انه بيجيب فلوس 

وبقت إظهار حياتهم على السوشيال ميديا هو الضمان الوحيد لتأمين مستقبلهم 

ونسينا إن البيوت اسرار وإن اصول البيوت هيه صونها وحمايتها مش إشاعتها للملأ

وبقا فيه شباب عادى يعملوا اى حاجه مقابل الشهره 

 

• للأسف احنا بندمر اجيال كتير بنفسنا 

متستغربش لما تشوف ابنك الصغير اللى من المفترض يكون بيتفرج على قنوات الكرتون قاعد على موبايل ولما تسأله نفسك تطلع إيه يقولك بلوجر

زمان لما كنا نسأل الأطفال نفسك تطلع ايه

اللى يقول دكتور واللى يقول مدرس واللى يقول مهندس 

كتير بنلاقى اطفالنا قصاد الموبايلات بيتفرجوا على الأشخاص دى وللأسف فيه اطفال كتير واخداهم قدوه

 

ومعايير المجتمع الشرقى بقا غربى 

كل دة بسبب تقليد الغرب 

الشباب بقا يستسهل فكره الشهره ودة أمر طبيعى من اللى بقوا يشوفوه من حياه البلوجر المرفهه 

وحقيقى كتير من الشباب اللى نشروا حياتهم وسكنوا فى قصور وجابوا عربيات ولكنهم فقدوا شعور الاسره والخصوصيه شعور البيت والدفئ 

 

• فيها ايه لو نرجع لأيام افراح زمان 

ايام العروسه فيه كانت تبقى قاعده برينسس على الكوشه فيها اناقه فيها ايه لو نلغى فكره نشر تقاليع الافراح المجنونه على الفيس فيها ايه لو نرجع لحياتنا زمان 

ايام ماكان الشاب بيشقى ويتعب علشان يجهز بيته ويكون اسره سعيده ويكون راجل قد المسؤولية مهما كانت الوظيفه هتكون اجمل واحسن من مجرد رقص قصاد الكاميرا أو عرض اهل بيته تحت مسمى كلمه بلوجر 

قبل ما يكون هدفه فى الزواج هو الشهره ما بعد الزواج وانتظار الملايين 

احنا بنشوف الحلو بس من حياه البلوجر 

بنشوف اللى هما عايزيننا نشوفه مش كل اللى مفروض نشوفه 

بس مشوفناش الضريبه اللى بيدفعوها قصاد حياتهم المشاعه على الملأ 

وللأسف بقت اغلب تمنيات الفتيات والعرايس

افراح عظيمه زى فرح البلوجر فلانه عايزه فستان زى البلوجر فلانه وبقا فيه حاله من عدم الرضا على إمكانيات العريس 

ياريت نرجع تانى نغرز فى أبناءنا قيم وأساليب التربيه الصحيحه ياريت نربيهم على الطريقه القديمه وليست الطريقه الحديثه 

نرجع تانى لمسلسلات ونيس اللى اتربينا عليها نبدأ نبعدهم عن الالعاب الالكترونيه ونستبدلها بألعابنا الورقيه 

نبعدهم عن تلوث التيك توك والرقص والغنا ياريت يبقى فيه مراقبه من الأهالى على موبايلات أطفالهم ميبقاش الهدف الوحيد هو راحه الام على حساب إنشغال أطفالها بالموبايل 

ويقولوا مش مهم المهم إنه بيتفرج وقاعد ساكت مش عامل دوشه 

وميعرفوش إن دى راحه مؤقته ولكن هيجى وراها سيول واعاصير من المشاكل المستقبليه وبناء طفل غير سوى كل تفكيره فى التيك توك والتقليد الاعمى لمشاهيرهم وهيبقى فيه رفض لسماع النصيحه فى وقت كان ممكن زمان فى البدايه تشغلى وقته باللى يفيد ويخرجه شخص سوى 

لو عملنا كده اكيد حالات المصائب فى المجتمع هتقل 

المجتمع كل يوم بيزيد فيه الطاقه السلبيه وبيزيد فيه حالات القتل والشوارع بيزيد فيها اطفال من تربيه التيك توك والبلوجر 

 

لو عايز تطلع وتظهر نفسك على السوشيال ميديا 

اظهر نفسك بجهدك بعلم يتنفع بيه غيرك بتجربه ناجحه هتفيد بلدك إحنا مش هنستفيد من حياتك بشئ لكن هنستفيد بعلمك بمعلومه صادقه خرجت تقولها لينا لو عايز تستخدم السوشيال ميديا استخدمه استخدام صحيح يجعلك فى نظر مجتمعك شخص مبتكر وليس سلعه معروضه على السوشيال ميديا بلا فائده............

 

بقلم دعاء فرج…