خفايا وأسرار قصه ريا وسكينه سفاحين الإسكندرية

اجيال كامله تعرف قصه ريا وسكينه وجيل ورا جيل عارف القصه واللى مش عارفها بيعرفها سواء من عيلته أو من التليفزيون ومن المسلسلات والمسرحيات والافلام اللى بنشوفها 

خفايا وأسرار قصه ريا وسكينه سفاحين الإسكندرية

اجيال كامله تعرف قصه ريا وسكينه وجيل ورا جيل عارف القصه واللى مش عارفها بيعرفها سواء من عيلته أو من التليفزيون ومن المسلسلات والمسرحيات والافلام اللى بنشوفها 

بس كده كده مهما كان عمرك اكيد هتسمع عنهم 

 

  • طب والقصه اصلا بدأت من فين ؟ 

 

ريا وسكينه دول اتنين اخوات اتولدوا فى صعيد مصر وكانت ريا ودة اللى الناس كلها عارفاه هيه الاخت الكبيره لسكينه

والدهم اتوفى من سنين طويله والام هيه اللى بقا عليها مسئوليه تربيتهم وحقيقى يا زين ما ربت عرفت تطلعلنا اخطر المجرمين اللى اتسجلوا فى التاريخ واتعرف اسمهم على مر السنين 

لما كبروا خدوا بعضهم وراحوا كلهم على بنى سويف ولكن مقعدوش فيها كتير وخدوا بعضهم وراحوا على كفر الزيات وكان الاختين بيشتغلوا هناك فى جمع القطن 

وبعد كده اتجوزت اول اخت فيهم وهى ريا لواحد طبعا كلنا عارفينه وهو حسب الله وكان أول طفله ليها بعد الزواج هيه البت بديعه 

 

  •  وبعد فتره ولدت ولد ولكن يشاء القدر والطفل دة يموت وكأن ربنا مش عايز يبقى ليها نسل فى الدنيا وبصمه عار فى حياه الطفل هتلاحقه طول حياته هو وأحفاد أحفاده 

 

  •  أما سكينه بقا فهى راحت الاسكندريه مع جوزها وبالخصوص فى حى اللبان وكان الكلام دة سنه 1918 ويدوب مكملتش السنه ولحقتها ريا على هناك علشان يحل على أهل الاسكندريه اللعنه الكبيره 

وبعد كده الست سكينه معمرتش فى زواجها واتجوزت بعدها على طول من جارها اللى اسمه عبد العال وطبعا كلنا عارفين مين هو عبد العال وبعد كده اتعرفوا على عرابى حسان وعبد الرازق يوسف 

 

  •  ايام الحرب العالمية الاولى

طبعا ايام الحرب العالمية الأولى دى أثرت على العالم كله ومادام فيه حرب يبقى اكيد فيه انهيار اقتصادى ويبقى الناس داخلين على ايام فقر وتقشف ودة اللى حصل بالفعل والبطاله بقت فى كل مكان ومبقاش فيه اكتر من المتسولين 

ودة اللى اضطروا بسببه ريا واختها سكينه يشتغلوا فى دعاره مقننه وفى الخمور كمان ولكن حصل مشاكل كتير دة غير حركات البوليس اللى كانت بتقفل البيوت دى وبتقاضى اللى فتحهها وساعتها قفلوا الشغلانه دى خالص وراحوا يسرقوا دهب السيدات وياريتهم بيسرقوا الدهب بس لا دول كمان كانوا بيقتلوهم وبيدفنوا الجثث فى نفس مكان معيشتهم يعنى عادى جدا لما تبقى نايمه وتحت رأسها اكتر من 11 قتيل 

 

  •  طب ازاى كانوا بيستدرجوا السيدات دول علشان تتم عمليه القتل ؟ 

مفيش احلى من الكلام الجميل اللى يتقال لأى واحده منهم وتكسب صداقتها وشويه كمان وتبقى صاحبتها ودة بالظبط اللى ريا وسكينه عملوه كانوا يدخلوا على الضحيه ويتعرفوا عليها وكأنهم اصدقاء وتبدأ السيده تديهم الأمان وبعد كده تبدأ تسدرجها فى بيتها ويكون فى انتظارها عبد العال وحسب الله ويقوموا بخنقها بمنديل مبلل ويقيدوا حركتها لحد ما تقطع النفس وساعتها ياخدوا منها كل أموالها ودهبها حتى ملابسها ويدفنوها مع باقى الضحايا تحت الارض ولا من شاف ولا من درى 

 

  •  طب كانوا بيجيبوا السيدات دى منين ؟

هما كانوا مختصين فى الأماكن اللى فيها زحمه كده زى زنقه الستات ودة كان انسب مكان يعرفوا يأثروا فيهم على ضحيتهم ويتكلموا معاها لحد لما بيستدرجوها 

 

وبعد كده تقوم ريا وسكينه رايحين عند الصايغ اللى بيبقى على علم إن الدهب دة مسروق ويقوم يشتريه منهم بأقل الاثمان 

 

  •  طب ازاى الشرطه عرفت مكانهم وأفعالهم ؟ 

ريا وسكينه خدوا الموضوع حرفه وصعنه وعدد ضحاياهم زادوا لحد لما وصلوا ل17 قتيله ولكن الشرطه مش بالساهل أنها تلاقى المجرم الحقيقى ودة علشان الوقت اللى كان بيختفى فيه السيدات كان هو نفس الوقت اللى كان فيه سيدات تانيه بتهرب من أسرتها بدافع الحب أو الفقر ومحدش بيعرف عنها حاجه ودة اللى الشرطه كانت بتصنفه لما يحسبها بلاغ بحاله اختفاء سيده اول اقتراح ييجيلها إن اكيد السيده دى هربت لأى سبب من السببين وبيتم اغلاق القضيه على كده ودة غير إن اصلا ريا وسكينه مكانش باين تفاصيل وشهم ولا حد عارفهم إحنا نسينا إننا كنا فى زمان البيشه والملايه اللف ولا إيه ؟ 

علشان كده كان صعب التعرف عليهم يعنى كانوا بيقوموا بعمليه السرقه والقتل من غير ما حد يعرف هويتهم دة غير ان ريا وسكينه كانوا بيستدرجوا الضحيه بكامل إرادتها يعنى زى ما بيقولوا كده رايحه لقضاها بإيديها ومكانتش الضحيه بتلحق تستغيث ودة غير أنها تعتبر أول قضيه الجانى فيها سيده لأن دايما كان التركيز على الرجال اكتر وكله بيستبعد أن السيده هيه اللى هتكون مرتكبه الجريمه بس كل الكلام دة قبل ومن ريا وسكينه لأن زمن ريا وسكينه كانت بدايه الجرائم النسائيه 

 

  •  لحظه اكتشاف الشرطه بعصابه ريا وسكينه 

من عدد البلاغات اللى كانت بتتبعت فى الشرطه  

واول بلاغ فى سنه 1920 الشرطه جالها بلاغ من زينب حسن البالغه واللى عمرها 40 سنه  بتطلب النجده عن اختفاء بنتها اللى عمرها كان يناهز 25 سنه وهيه نظلى ابو الليل وأنها كانت لابسه عقد دهبى وإن اكيد الخطف كان بغرض السرقه 

وتانى بلاغ كان فى نفس العام وكان البلاغ من محمود مرسى اللى كان بيبلغ عن اختفاء أخته زنوبه والبرغم إن محمود مرسى ذكر اسم ريا وسكينه وقال إنهم اكتر اتنين كانوا ليهم علاقه بأخته ولكن الشرطه استبعدتهم 

وتالت بلاغ بنت عمرها 15 سنه وكتبت فى البلاغ عن اختفاء والدتها زنوبه عليوة وكانت بتشتغل بياعه طيور وعمرها 36 سنه وبرضوا البنت قالت فى البلاغ إن اخر حد كان مع والدتها هما ريا وسكينه 

 

 

  • وبالصدفه البحته عرفوا إن ريا وسكينه ليهم يد فى الموضوع دة طب ازاى دة حصل ؟ 

دة بقا حصل بالظبط لما ريا وسكينه سابوا البيت وجثثه وراحوا يشوفولهم مكان تانى بعد لما راض البيت مبقتش تساع جثث تانيه لدرجه ان الارض بقت تشقق من كتر الجثث 

وصادف الحظ إن صاحب البيت القديم وهو محمد احمد السمنى قام بتأجير البيت دة لواحد ايطالى ولكن كان شرط الساكن الجديد دة إنه يتم عمل صرف جديد فى البيت وساعتها فى وقت الحفر اكتشفوا وجود عظام بشريه تحت الارض وطبعا بعد البلاغ بدأت الشرطه فى التحريات ومين اخر واحد كان ساكن فى البيت ؟ وطبعا هما مفيش غيرهم

دة غير ان واحد من المخبرين لاحظ خروج بخور قوى من منزل ريا ولما سأل ايه سبب البخور دة ادعت أنها بتبخر علشان تتخلص من ريحه المخمورين اللى بيكونوا فى المكان ولكن طبعا محدش صدق الكلام دة ولما طلبوا بتفتيش البيت اكتشفوا إن البلاط حديث التركيب ولما قربوا من البلاط كان فيه ريحه عفنه جدا واكتشفوا وجود جثه لأمرأه 

 وريا وسكينه طبعا اتقبض عليهم فى قسم اللبان وكانوا فى البدايه متماسكين بمقوله " منعرفش حاجه ولا شوفنا حاجه " 

ولكن اللى مكانوش عاملين حسابه هو البت بديعه اللى مخدتش وقت واعترفت على العصابه كلها من اول ابوها وامها لحد خالتها وجوز خالتها  وقالت كل تفصيله شافتها وهيه بتتجثث وبتشوف إيه اللى بيحصل ورا الباب 

دة غير انهم أثناء تفتيشهم فى بيت المتهم عرابى مصوغات دهبيه ومبلغ قيمته 120 جنيه دة غير ان نفس المبالغ عثروا عليها فى بيوت باقى المتهمين 

وساعتها التهمه ثبتت عليهم وتم سجن الصائغ  وهو حسن على لمده خمس سنين اللى كان بيشترى منهم الدهب اللى كان على علم إنه مسروق وتم تنفيذ حكم الاعدام فيهم  فى عام 1921 بعد ماكان القانون بيمنع إعدام النساء

 

  • أما بديعه فأنتهى بيها الحال فى دار ايتام فى فيه اللى بيقولوا إن تم إحراق دار الايتام ومات كل من فيه بما فيهم الطفله بديعه بنت ريا وسكينه وينتهى نسل اخطر مجرمه 

 

  • التقرير الطبى لريا وسكينه اللى أجرته اداره تفتيش عموم السجون التابعه لسجن الاسكندريه
  • التقرير الطبى لريا على همام 

الاسم : ريا على همام 

السن.  : 45 سنه 

وزنه عند دخول السجن : 42 كيلو جرام واخر وزن ليها قبل تنفيذ حكم الاعدام 50 كيلو جرام 

حالتها الصحية قبل دخول السجن : جيده 

حالتها الصحية قبل تنفيذ حكم الاعدام : لون الوجهه باهت وحائره 

اخر عباره قالتها قبل تنفيذ حكم الاعدام : " اودعتك يا بديعه بنتى عند الله " ونطقت بالشهادتين

مده الزمن التى شعرت بدق النبض فيها بعد الشنق : دقيقتين 

 

  • التقرير الطبى لسكينه على همام 

الاسم : سكينه على محمد همام 

العمر  :. 42 سنه 

الوزن عند دخول السجن 47 كيلو جرام سنه والوزن قبل تنفيذ حكم الاعدام 53 كيلو جرام 

وبكده تكون الاسكندريه عروس البحر رجعت تشعر بالأمان مره تانيه بعد موت أخطر القتله السفاحين اللى عيشوا الاسكندريه فى رعب كبير لحد لما تم تحقيق العداله وانتهت قصتهم وقصه نسلهم.................

 

بقلم دعاء فرج ........

ما هو رد فعلك؟

like

dislike

love

funny

angry

sad

wow