مصطفى محمود من العلم إلى الإلحاد واسرار وخفايا فى حياته

ناس كتير متعرفش عن مصطفى محمود غير إنه صاحب برنامج العلم والايمان وناس كتير بتقول إنه الحد من كتر العلم واتعرف عنه إنه واجه الكتير من الصراعات فى حياته

مصطفى محمود من العلم إلى الإلحاد واسرار وخفايا فى حياته

ناس كتير متعرفش عن مصطفى محمود غير إنه صاحب برنامج العلم والايمان 

وناس كتير بتقول إنه الحد من كتر العلم واتعرف عنه إنه واجه الكتير من الصراعات فى حياته 

 

  • مين هو مصطفى محمود

 

هو مصطفى كمال محمود حسين المحفوظ 

اتولد فى20ديسمبر 1921 فى شبين الكوم فى المنوفيه لكن قضى كل حياته فى طنطا 

كان من الأطفال الأنطوائيه الضعيفه ومكانش عنده اى صحاب 

بس عرف ياخد من الكتاب الصاحب الوفى ليه 

وكان بيلاقى استمتاعه فى إنه ياخد كتبه ويقعد فى مكان هادى ويقرى ويتأمل

 

  •  واحنا صغيرين كلنا أو معظمنا سأل السؤال المعتاد هوه مين اللى خلق ربنا ودة نفس السؤال اللى سأله مصطفى محمود لمعلم الفصل 

 

ومن المفترض إن المدرس يفهم الطالب اللى هوه مصطفى محمود ويكلمه براحه ودة عكس اللى حصل لإن المدرس اتهم مصطفى محمود بالجنان وضربه 

وساعتها زى ما بنقول كده مصطفى محمود اتعقد ومراحش المدرسه تانى غير بعد تلات سنين لما المدرس اتنقل من المدرسه 

 

  •  مصطفى محمود من صغره وكان أفكاره مختلفه وغريبه 

 

ودة لما كان عنده 12سنه وجمع صحابه وكونوا جماعه وسموها بجماعه الكفار وكانت الجماعه دى ضد الأديان كلها 

وكان مقتنع تماما برأيه وإنه من حقه أنه يشك فى الأديان لدرجه انه كان بيطبع المنشورات ويرميها فى الجامع 

ويكتب فيها " انتوا بتقولوا إن ربنا اللى خلق الانسان طب مين بقا اللى خلق ربنا " 

وساعتها الناس اللى فى الجامع ضربوه وطردوه 

ودة اللى زود الشك عنده لأن محدش بيجاوبه على أسئلته 

 

  •  لما نجح فى الثانويه وطلع الأول

 

أهله اقترحوا عليه إنه يدخل كليه الحقوق ومعروف عنها فى الوقت دة إنها كليه البشوات 

لكن مصطفى كان طموحه واهتماماته فى مكان تانى ودة لانه كان مهتم بالموسيقى والأدب 

ولكن أهله طبعا موافقوش على كل دة وأشاروا عليه إنه يدخل الحربيه زى اخوه مختار 

ولما دخل الكليه مقعدش كتير وخرج منها ودخل بعدها كليه الطب جامعه القاهره ودخلها مش حبا فيها ولكن علشان يعرف اصل كل حاجه وجسم الإنسان أساسه إيه وإنه اكيد لما يدخل الكليه هيعرف كل حاجه اصل العلم دة اساس كل حاجه

 

  •  كان بيعشق المشرحه والجثث 

 

لدرجه انه تلقب فى الكليه " المشرحجى" 

ومن حبه فى التشريح اشترى جثه بخمسين قرش وخباها تحت سريره فى طشط فورمالين علشان يعرف يذاكر عليها 

وطبعا كان لريحه الفورمالين اللى تحت السرير اضرار كبيره عليه لدرجه انه حصله التهاب رئوى وفضل مريض لمده تلات سنين وطبعا دة خلاه بتأخر فى التخرج تلات سنين ولكن مصطفى محمود مفضلش قاعد يبكى عند مرضه ولكنه قرى الادب العالمى كله والتلات سنين دول غيروا اهتمامات مصطفى محمود ودة لانه بعد ما كان عاشق للطب بقا عاشق للأدب والكتابه 

فى الفتره دى اشتغل عازف ناى ورا الراقصه فتحيه سوست 

وكان بياخد ريال فى الفرح دة غير العشا 

وناس قالت إنه كان صوته حلو وبيعشق الناى 

وفى أواخر الأربعينات اتعرف على العقاد وإحسان عبد القدوس وكامل الشناوى واشتغل فى الصحافه وهو طالب وبقا يكتب مقالات وقصص فى اخر ساعه 

دة غير أن كل كتابات مصطفى محمود فى بداياته مكانش ليها اى علاقه بالعلم أو الدين وكانت عن الفن أو الفنانين أو عن القصص الرومانسيه وكان معروف عنه إنه معشوق البنات وبقا صديق لكل فنانات مصر 

 

  •  وعرف مراته الاولى ساميه واللى كانت ملكه جمال مصر 

 

  •  1956 ونشر كتاب مصطفى محمود وهو الله والإنسان

 

ومن هنا بدأت أزمات مصطفى محمود والمشاكل بدأت تزيد

والكتاب دة كان كتاب فلسفى عجيب وأفكاره غريبه 

وهى نفس الأفكار اللى أتراجع فيها مصطفى محمود بعد كده 

زى مثلا أنه قاله " إن الإنسان هو اللى صنع الصلاه وإنه مش أمر الهى" وان" الأديان عباره عن قصص"  ودة نموذج من أفكاره اللى ذكرها فى الكتاب 

وطبعا الدنيا اتقلبت والأزهر اتهمه إنه دعوه للكفر والإلحاد واتحاكم فى محكمه امن الدوله وتم مصادره الكتاب ودى طبعا كان اهون عقوبه والأمر دة كان من عبد الناصر شخصيا 

 

  • على قد مشاكل الكتاب على قد اكتساب مصطفى محمود للشهره

 

وناس كتير شاوفوا فيه الفيلسوف وحاز اعجاب العلمانيين والشيوعيين ودة على عكس المسلمين اللى شافوه أنه ملحد وكافر 

ومن ساعتها " اتعرف عنه إنه مصطفى محمود الملحد" 

وكان موقف مصطفى محمود موقفه معادى لعبد الناصر وكان شايف إن عبد الناصر راجل ديكتاتور قام بتحويل مصر لمقبره 

وكان بيرفض فكره الناصريه لانه شايف إن أفكاره عقيمه 

وقام بكتابه مقالين خطر جدا عن عبد الناصر فى وقت كان يخاف فيه الشخص أنه يتجرأ بالغلط على عبد الناصر وهو مقال سقوط اليسار ومقال الخروج من مستنقع الشيوعيين

ووصف فيهم عبد الناصر " بدراكولا العصر" 

وطبعا الكلام دة وصل لعبد الناصر ووصل الكلام من طرف 

"محمد حسنين هيكل "

وساعتها تم إصدار قرار بمنعه من الكتابه سنه كامله 

وكالعادة مقعدش على الفاضى لا دة كتب تلات مسرحيات بيعيب فيهم عبد الناصر بكل شكل من الأشكال والمسرحيات دى محدش سمع عنها حاجه غير فى عهد السادات 

وحاول مصطفى أنه يخلى صديقه يتوسطله علشان يرجع للكتابه تانى لكن صديقه مقدرش ولكن محمد حسنين هيكل سمحله بإنه يرجع للكتابه تانى 

 

  •  كتاب القرأن محاوله لفهم عصرى 

 

بسبب الكتاب دة اتعرض مصطفى محمود لهجوم كبير جدا وكان الهجوم والمعارضة دى بقياده عائشه عبد الهادى وكتبت 300 مقال علشان تهاجم فيهم الكتاب وحصلت ثورات كتير جدا وذكرت إن الكتاب مش بيخلوا من العيوب 

ومن ساعتها أطلقوا عليه الكافر الملحد دة غير رسالات التهديد اللى كانت بتوصل لمصطفى محمود من الجماعات وكان التهديد بالقتل 

 

  •  على عكس علاقه الناصر بمحمود العدائيه فكانت علاقه الود والصداقه ما بين السادات ومصطفى محمود 

 

السادات اللى أبدى إعجابه الشديد جدا بالكتاب 

 

  •  1970 وكتاب رحلتى من الشك إلى الإيمان 

 

الكتاب دة رد فيه على كل الاسئله اللى هو سألها فى الله والإنسان والكتاب دة توثيق لبحث 30 سنه وصلته بعد رحله شك طويله الى قمه الايمان والتمعن 

والإسلاميين غيروا فكرتهم عنه وحبوه جدا وقالوا عنه إنه منبر الإيمان ولكن الشيوعيين كرهوه جدا 

 

  •  1976 السادات عرض على مصطفى محمود 

 

إنه يكون وزير الثقافه ولكن مصطفى محمود رفض وقاله أنه فضل فى اداره اصغر وحده فى جوازه يبقى ازاى هينجح فى الوزاره وقال كده لانه كان لسه مطلق مراته ساميه فى 1973 بعد جواز استمر ل12 سنه ونتج عن الجواز طفلين وهما امل وادهم 

وساعتها وافق السادات على قراره وخلاه المستشار الثقافى الخاص به 

وكان السادات بيشجعه إنه يعيد نشر كتاب الله والإنسان ووعده إنه مش هيتم تلحيده زى ما حصل ايام عبد الناصر 

ولكن مصطفى محمود رفض وقام بتنزيل كتاب وهو 

 

  •  حوار مع صديقى الملحد 

 

والكتاب دة حصل على شهره كبيره جدا والناس استنتجت إن الملحد المقصود به هو مصطفى محمود نفسه وفى الكتاب دة جاوب فيه مصطفى محمود عن كل الاسئله الالحاديه بشكل علمى ومنطقى وده علشان يوصل الملحد من رحله الشك لطريق الايمان بإعتباره واحد من الأشخاص اللى تعرض الإلحاد فى يوم من الايام 

 

  •  برنامج العلم والايمان

 

اللى أغلبنا ميعرفوش أن اللى كان هيقدم البرنامج دة قبل مصطفى محمود هو عبد الرحمن على وكان مصطفى محمود هوه معد البرنامج بس مش اكتر ولكن عبد الرحمن على أتراجع وساعتها اللى قدمه مصطفى محمود وكان عايز يوصل للناس بالبرنامج دة إن العلم والايمان وجهان لعمله واحده وكانت مقولته الثابته هيه " لم تكون متدينا إلا بالعلم لأن الله لا يعبد بالجهل"

وطلعت الحلقه الاولى فى  1971 وكانت بالابيض والاسود بتتر الناى الرائع المعروف وكان البرنامج واخد شهره واسعه جدا والناس بتستناه بفارغ الصبر وكان كل اتنين الساعه 8وربع بالليل والتليفزيون المصرى فى الوقت دة كان بيصرفله 30جنيه للحلقه ودة طبعا كان اجر زهيد جدا لحد لما رجل الأعمال رياض العريان أنتج البرنامج وعطاله 20000دولار تمن الشرايط و300جنيه فى الحلقه الواحده وفضل البرنامج يتذاع لمده 28سنه قدم فيها اكتر من 400حلقه

لحد 1994 لما بدأ مصطفى محمود يتعارض مع اسرائيل فى البرنامج والمقالات وفى الكتب ودة اغضب الإسرائيليين جدا وكلموا حسنى مبارك وبلغوه استيائهم من معارضه مصطفى محمود ليهم وساعتها أمر حسنى مبارك صفوت الشريف بوقف برنامج مصطفى محمود واتوقف اشهر برنامج فى مصر والوطن العربى كله 

 

  •  ارض ملك مصطفى محمود فى المهندسين سنه 1976

 

وبنى عليها مسجد ومستشفى وجمعيه محمود على اسم والده وجهز المستشفى بأحسن الاجهزه الطبيه والكشف كان بجنيه 

 

  •  1982 زواج مصطفى محمود

 

اتجوز مصطفى محمود مراته التانيه السيده زينب حمدى 

وكان عنده فى الوقت دة 61 سنه وكان مخصص وقته للجمعيه والمستشفى وكان كاتب على باب غرفته التابوت وفشل الزواج وتم الطلاق سنه 1984 ولكن استمرت علاقتهم بالود والصداقه 

وانتقل مصطفى محمود فى غرفه فى الجمعيه وكان مسميها الصومعه 

 

  • 1999 نشر مصطفى محمود كتاب اسمه محاوله لفهم الشفاعه وبعد كل إنجازاته وتاريخه تم اتهامه بالإلحاد  والكفر وإنكار شفاعه الرسول وأن يهدر دمه 

 

واللى حصل علشان كل دة يحصل هو إنه قال 

" إنه مش ممكن الرسول يتوسط لربنا إنه يخرج العصاه  والقتله والزناه من النار ويدخلهم الجنه لمجرد الشفاعه" 

 وقال إن الشفاعه دى بتكون شفاعه إلهيه وهى أن يأذن بيها الله أو لا يأذن 

ورجعت الناس تانى نتقلب عليه وتطلق عليه الكافر الملحد 

حتى شيخ الأزهر محمد سيد طنطاوى اللى كان مأيده جدا فى البدايه اول ما لاحظ التقلبات على مصطفى محمود محاولش إنه يتكلم فى الموضوع مره تانيه 

وحاول مصطفى محمود يبرر كلامه لكن محدش سمح إنه يسمعه وكان فى الوقت دة مصطفى محمود كان عنده 79 سنه وشعر بحزن وعدم تقدير على كل تاريخه ومجهوداته 

فدخل فى انعزال تام لمده عشر سنين واختفى عن الإعلام وولاده ذكروا إن محدش كان بيسأل عليه طول الفتره دى 

لحد لما صحته اتدهورت والزهايمر سيطر عليه سيطره كامله

وفضل فى المستشفى لمده 255يوم لحد وفاته يوم السبت 31 اكتوبر 2009 عن عمر 87سنه وكانت جنازته جنازه شعبيه وغاب عنها الإعلام والمشاهير والمسئولين واندفن واندفنت معاه قصصه وحكاياته ولكن سيرته لسه عايشه وموجوده وأغلب الأشخاص اللى هتسألهم مين هو مصطفى محمود هيقولك اللى الحد من كتر العلم..............

ما هو رد فعلك؟

like

dislike

love

funny

angry

sad

wow